पाल्पामा प्रमुख जिल्ला अधिकारी आफै निस्किए सिलिण्डर खोज्न
पाल्पाका अस्पतालहरुले अक्सिजनको कमी देखाएर भर्ना लिनै बन्द गर्न थालेपछि प्रमुख जिल्ला अधिकारी योगेन्द्र पाण्डेको नेतृत्वमा प्रहरीहरुको टोलीले सम्भावित ठाउँहरुमा पुगेरै ११२ वटा अक्सिजनका सिलिण्डर जम्मा गरेको छ ।
प्रमुख जिल्ला अधिकारी सहित जिल्लाका एसपी सन्तोष भट्टराईको नेतृत्वको समूहले जिल्लाका ग्याँस प्रयोग हुने साना ठूला उद्योग, ग्यारेजहरुमा खोजविन गरेको थियो ।
यसरी जम्मा गरिएका सिलिण्डरहरु पाल्पा अस्पताललाई ३७, लुम्बिनी मेडिकल कलेजलाई ३० र मिशन अस्पताललाई २० वटा दिइएको थियो । बाँकी जिल्लाको विशेष कोभिड अस्पतालको लागि छुट्याइएको छ ।
जिल्लामा संक्रमणको दर निकै बढिरहँदा छिमेकी तराईका जिल्लाहरु रुपन्देही, नवलपरासी, कपिलवस्तुबाट ठूलो संख्यामा कोभिडका बिरामीहरु पाल्पा आएका छन् ।
त्यस्तै, स्याङ्जा, गुल्मी र अर्घाखाँचीबाट पनि बिरामीहरु आउने ठाउँ तानसेनकै अस्पताल हुन् । यसरी आउँदा अस्पतालहरुलाई थेग्न निकै गाह्रो परिरहेको छ ।
प्रजिअ योगेन्द्र पाण्डेले जिल्लामा अक्सिजनको अभाव भएको र त्यसको पूर्तिको लागि बारा, रुपन्देही लगायत सम्भाव्य जिल्लाहरुका प्रमुख जिल्ला अधिकारीहरुसँग समन्वय गरेर ल्याउने काम भइरहेको बताए । तर सबैतिरको चापका कारण आफूहरुलाई जिल्लाका अस्पतालहरुमा अक्सिजन पुर्याउन निकै गाह्रो भइरहेको भनाई उनको छ ।
उनले भने “जिल्लामा अक्सिजन प्लान्ट छैन । छिमेकी जिल्लामा पालो कुरेर ल्याउँदा ढिलो भइरहेको छ । अक्सिजनको चरम अभावले हामीहरु तनावमा छौं । जिल्लाका सम्भाव्य सबै ठाउँहरु खोजेर यौटा मात्रै सिलिण्डर भए पनि जम्मा गरिरहेका छौं ।”
