एनआरएनए अफ्रिकाद्वारा नेपालका १० जिल्लालाई अक्सिजन सहयोग

कोरोना भाइरसको दोस्रो लहरले ठूलो बिपत्ती निम्त्याइरहेका बेला गैर आवाशिय नेपाली संघ अफ्रिका (एनआरएनए अफ्रिका) ले नेपालका १० जिल्लामा अक्सिजन उपलब्ध गराउन सहयोग गर्ने भएको छ ।

नेपालका १० जिल्लामा सुलभ अक्सिजन पुर्याउन भन्दै एनआरएनए अफ्रिकाले १२ लाख रुपैयाँ सहयोग गर्न लागेको हो ।

कोरोना संक्रमणले स्थिति झनझन बिग्रँदै जाँदा अक्सिजन समेत नपाएर बिरामीहरुको मृत्यु हुनथालेपछि अफ्रिका महादेशका विभिन्न देशका एनआरएनएबाट सहयोग बटुलिएको हो ।

नेपालका १० जिल्लामा अक्सिजन आपूर्तिका लागि स्थानीय निकाय, संघ संस्थासँग समन्वय गरि १२ लाख सहयोग पठाउने निर्णय भएको एनआरएन अफ्रिकाले जनाएको छ ।

स्वदेशलाई अप्ठ्यारो परेको बेला थोरै संख्यामा रहे पनि अफ्रिकाका नेपालीहरुले हरेक विपदमा सहयोग गर्दै आइरहेका छन् । “यस पटकपनि हाम्रो यो सानो सहयोगले महामारी प्रभावित ठाउँमा थोरै भएपनि राहत हुने हाम्रो विश्वास छ” एनआरएनए अफ्रिकाका क्षेत्रीय संयोजक रोशन थापाले भनेका छन् ।

महामारीसँगको यो लडाँइमा एनआरएन अफ्रिकाको पूर्ण साथ र सहयोग रहने बचनपनि थापाले दिएका छन् ।

आजै आइतवार बसेको एनआरएनए अफ्रिका क्षेत्रिय बैठकले क्षेत्रिय सह संयोजक कङ्गोका अध्यक्ष अमृत क्षेत्रीको संयोजकत्वमा कङ्गो, घाना, मोजाम्बिकका एनसीसीहरु र कृष्ण डुम्रे आइभोरी कोस्टको सहयोगमा पाल्पा, गुल्मी, नवलपुर, नवलपरासी र स्याङ्जामा ३ लाख ५० हजार बराबरको ५ सय ५० सिलिन्डर अक्सिजन भरेर बुटवलबाट पठाउने निर्णय गरेको छ ।

त्यस्तै, एनआरएनए सेसेल्स अध्यक्ष रामप्रसाद पन्तको संयोजकत्वमा सेसेल्स र केन्या एनसीसीले चितवनमा करिव २ लाखको तत्काल आवश्यक स्वास्थ्य सहयोग गर्ने छ । एनआरएनए युगान्डा अध्यक्ष बिनोद थापाको संयोजकत्वमा बारा पर्सा लगायत दुई नम्बर प्रदेशमा युगान्डा, बोत्स्वाना र दक्षिण अफ्रिकाका एनसीसीको सहयोगमा ३ लाख बराबरको अक्सिजन आपूर्तिमा सहयोग पुर्याउने छ ।

त्यसैगरि, अन्तर्राष्ट्रिय समितीकि महिला उप संयोजक मन थापाको संयोजकत्वमा सुदुर पश्चिम प्रदेशमा तिन लाख बराबरको अक्सिजन आपूर्तिमा सहयोग पुर्याउने गरी नाइजेरिया, जाम्बिया र तान्जानिया राष्ट्रिय समन्वय समितिले तत्काल सहयोग गर्ने निर्णय गरेको छ । क्षेत्रीय संयोजक थापाले थप सहयोग उठाउँदै जाने र आबश्यकता अनुसार अन्य जिल्लाहरुमा सहयोग गर्दै जाने बताएकि छन् ।

संघको क्षेत्रीय बैठकमा एनआरएनए मोजाम्बिककि अध्यक्ष देबी पौडेल, एनआरएनए कङ्गो अध्यक्ष अमृत क्षेत्री, एनआरएनए केन्या अध्यक्ष सुरज डुम्रे, एनआरएनए तान्जानिया अध्यक्ष पुष्प राज भट्टराई, एनआरएनए सेसेल्स अध्यक्ष रामप्रसाद पन्त र एनआरएनए युगान्डा अध्यक्ष बिनोद थापा लगायतको उपस्थिति थियो ।

बैठकमा संघका अन्तर्राष्ट्रिय समितिका पूर्व कोषाध्यक्ष हिक्मत थापाले “मुलुक अप्ठ्यारोमा परेको बेला अफ्रिकाका एनआरएन साथीहरूले उदार दिलले सहयोग गरेको” भन्दै प्रशंसा गरे । यो संकटमा पनि सधैं झैं योगदान पुर्याउनेमा बिश्वस्त रहेको उनले बताए ।