घलेले वार्तामा बोलाएर नआएपछि केसी वार्ता नगरि फिर्ता
गैर आवाशीय नेपाली संघ (एनआरएनए) को विवाद अन्तिम समयसम्म मिलाउन कोसिस गर्दै शेष घलेले दिएकै समयमा डा. बद्रि केसी पुगेपनि घलेले कुराएर नआएपछि केसी बुधवार वार्ता नगरि फर्किएका छन् ।
बुधवार फेरि वार्ता गरेर शेष घलेलाई मुलधारमै ल्याउन भन्दै शेष घले र बद्रि केसी बिच अध्यक्ष कुमार पन्त सहितको वार्ता तय गरिएको थियो । वार्ताका लागि पन्तले आग्रह गरेका थिए ।
वार्ता गर्न भन्दै डा. बद्रि केसी याक एण्ड यति होटेलमा पुगेका थिए । उनी घलेले दिएकै समयमा पुगे । तर घलेले कुनै खबरसमेत नदिएपछि केसी फर्किएका थिए ।
वार्ता आयोजक स्रोतका अनुसार आधा घण्टा कुराएरपनि कुनै ‘रेस्पोन्स नगरेको’ भन्दै केसी फर्किए ।
तर केसी फर्किएको निकैबेरमा घलेले फोन गरे । त्यसपछि केसीले जवाफ दिए ‘मलाई बोलाउनु भो । आउनु भएन । आधा घण्टा कुर्दापनि कुनै रेस्पोन्स गर्नुभएन । म पनि महाधिवेशनमा ब्यस्त मान्छे हुँ । म कुर्दाकुर्दा रेस्पोन्ससम्म नगरेपछि हिंडें, अब मेरोपनि समय छैन ।”
