बिहीबार, फागुन १७, २०८०

एनआरएनए केन्द्रिय अध्यक्षमा प्रतिबद्धतासहित महेश श्रेष्ठद्वारा उम्मेदवारी घोषणा

नेपालप्लस संवाददाता / काठमाडौं२०८० भदौ २९ गते १६:३७

गैरआवासीय नेपाली संघ (एनआरएनए) को ११ औं महाधिवेशनका लागि अध्यक्ष पदमा महेशकुमार श्रेष्ठले आफ्ना प्रतिबद्धताहरुसहित उम्मेदवारी सार्वजनिक गरेका छन् । आगामी १७ अक्टोबरदेखि तीन दिनसम्म काठमाडौंमा हुने महाधिवेशनका लागि हालका उपाध्यक्ष श्रेष्ठले दुई वर्षे (सन् २०२३–२०२५) कार्यकालका लागि शुक्रबार अध्यक्षमा उम्मेदवारी घोषणा गरेका हुन् ।

‘समुन्नत नेपाल, सम्मानित गैरआवासीय नेपाली’ नारासहित ललितपुरको हिमालय होटलमा आयोजित समारोहमा श्रेष्ठले अध्यक्षमा उम्मेदवारी घोषणा गर्दा धेरैले गम्भिर चासो राखेका छन् । सो अवसरमा उनले आगामी दुई वर्षको लागि पाँच नीतिगत योजनासहितको प्रतिबद्धता पत्र पनि सार्वजनिक गरे ।

समारोहमा संघको प्रतिष्ठा र गरिमामाथि प्रश्न उठिरहेको भन्दै श्रेष्ठले विश्वभर छरिएका प्रवासी नेपालीहरुलाई एकताको सूत्रमा बाँधी भरोसायोग्य, विश्वसनीय र संगठित एनआरएनए बनाउने दृढता व्यक्त गरे ।

‘सबल, साझा र एकताबद्ध एनआरएनए, परिणाममुखी, पारदर्शी र समावेशी एनआरएनए” बनाउने मेरो प्रमुख उद्देश्य र सर्वोच्च प्राथमिकता हुनेछ,’ उनले भने,‘एनआरएनएमा विगतको मेरो भूमिकालाई नजिकबाट अवलोकन गर्नुहुने सम्पूर्ण गैरआवासीय नेपाली समुदायलाई म पद र प्रतिष्ठाका लागि भन्दा पनि संघलाई ठोस योगदान दिने उद्देश्यले सक्रिय हुँदै आएको छु ।’

विजयी भएर शपथ लिएका दिनदेखि वार्षिक क्यालेन्डर र कार्ययोजना बनाएर सबैको विश्वास जित्नेगरी काम गर्ने संकल्प व्यक्त गर्दछु’ उनले थपे।

अध्यक्षमा उम्मेदवारी घोषणासँगै प्रतिबद्धताहरु सार्वजनिक गर्ने क्रममा श्रेष्ठले दुई वर्षे कार्यकालमा नेपालमा वैदेशिक लगानी भित्र्याउन ठोस नीतिगत पहल गर्ने मात्र होइन, गैरआवासीय नेपालीहरुको पूँजीलाई जन्मभूमिको विकासका लागि योगदान गर्ने उद्देश्यले सुरू गरिएको रु १० अर्बको सामूहिक लगानी कोषलाई तत्कालै कार्यान्वयन गर्ने पहिलो प्राथमिकतामा राखेको बताए ।

‘जन्मभूमिको विकासका लागि योगदान गर्न चाहने सबै गैरआवासीय नेपालीहरु समेट्ने उद्देश्यले सो कोषमा न्यूनतम २५० डलर लगानीको अवसर प्रदान गर्ने मेरो लक्ष्य छ । गैरआवासीय नेपालीहरुको लगानीलाई सुनिश्चित गर्न तथा वैदेशिक रोजगारीमा रहेका श्रमिकहरुलाई पनि लगानी कोषमा समेट्नका लागि आवश्यक कानुनहरुलाई समयानुकूल परिमार्जित तथा संशोधन गर्दै गैरआवासीय नेपालीको लगानीलाई समेत नेपालको धितोपत्र विनिमय बजारमा प्रवेश गराउन दिनरात प्रयास गर्नेछु,’ उनले प्रतिबद्धता जनाए ।

‘सन् २०३० सम्म १०० अर्ब डलरको अर्थतन्त्र बनाउन सहकार्य गर्ने’

अर्थतन्त्र मजबुत बनाउने पक्षमा दीर्घकालिन योजना र महत्वाकांक्षी सपनाहरु देख्नुपर्छ भन्ने मान्यता अनुरुप सन् २०३० सम्म नेपालको अर्थतन्त्र १०० अर्ब डलरको बनाउन एउटा स्पष्ट खाकासहित संघले नेपाल सरकार तथा नेपालको निजी क्षेत्रसँग सहकार्य गर्ने प्रतिबद्धतापनि जाहेर गरे ।

संस्था स्थापनादेखि नै प्रवासी नेपालीहरुको मुद्दामा सक्रियतापूर्वक काम गरेको उल्लेख गर्दै उनले विदेशमा आर्जन गरेको ज्ञान, सिप, प्रविधि र पुँजीलाई स्वदेशको विकास र समृद्धिका लागि उपयोग गर्न नेपाल सरकारसँग सहकार्य गरी श्रम तथा सिप बैंक स्थापना गर्ने प्रतिबद्धता जनाए ।

वैदेशिक रोजगारीमा देखिएका समस्याहरुको निराकरणमा सारथी बन्ने उल्लेख गर्दै अध्यक्षका उम्मेदवार श्रेष्ठले वैदेशिक रोजगारीको क्रममा मृत्यु भएका नेपाली श्रमिकका परिवारलाई वैदेशिक रोजगार बोर्डमार्फत उपलब्ध गराउँदै आएको आर्थिक सहायता कम्तीमा १५ लाख रुपैयाँ पुर्याउने व्यवस्था मिलाउन पहल गर्ने, श्रम स्वीकृति नलिई वा श्रम स्वीकृतिको अवधि समाप्त भई मृत्यु भएका श्रमिकका परिवारले पनि राहत रकम पाउने व्यवस्था मिलाउने दृढता व्यक्त गरे ।

उनले नेपाल सरकार, वैदेशिक रोजगार व्यवसायी संघ र दातृ निकायसंग समन्वय गरी १० करोडको श्रमिक कल्याण कोष खडा गर्ने प्रतिबद्धता पनि जनाए ।

महेश श्रेष्ठले आफ्नो उम्मेदवारी घोषणा गर्न काठमाडौंको होटेल हिमालयमा आयोजित कार्यक्रम

भावी दिनमा संस्थाको ओज र गरिमालाई अझै बढाउनेगरी काम गर्ने संकल्पका साथ संघको भावी नीति, रणनीति, कार्ययोजना मस्यौदा गर्न तथा दश वर्षे विस्तृत ‘भिजनरी’ दस्तावेज तयार गर्न विशेषज्ञहरु सम्मिलित एक उच्चस्तरीय समिति गठन गरेर काम गर्ने लक्ष्य तय गरेको उनले सुनाए । साथै ‘एक एनसीसी, एक परियोजना’ लाई एनआरएनए फाउन्डेसन मार्फत एकीकृत रुपमा अघि बढाउने, परराष्ट्र मन्त्रालयमा एनआरएनए विभाग स्थापनाका लागि पहल गर्ने साथै राष्ट्रिय समन्वय परिषद (एनसीसी) का अध्यक्षहरूलाई नेपाल सरकारको अवैतनिक वाणिज्य दूतको रुपमा मान्यता दिन नेपाल सरकारसँग पहल गर्ने पनि सो अवसरमा उनले जानकारी दिए ।

आफ्नो दुई वर्षे कार्यकालमा स्थायी वासिन्दा (पीआर) भई विदेशमा बसेका नेपालीहरुका सम्वन्धमा संविधानको धारा २९१ मा राखिएको विभेदकारी प्रावधान संशोधनका लागि पहल गर्ने र एनआरएनएको लामो समयको पहलपछि गैरआवासीय नेपाली नागरिकता प्राप्त गर्ने अवसर मिलिरहेकाले त्यसलाई कार्यान्वयनकालागि सहज बनाउन पहल गर्नुका साथै गैरआवासीय नेपालीहरु तथा भूपू गोर्खाहरुको वंशजको नागरिकताको निरन्तरताको लागि पहल गर्ने उनले प्रतिबद्धता जनाए ।

विदेशमै बसेर जन्मभूमि अर्थात मातृभूमिको प्रवर्द्धन र प्रचारमा गैरआवासीय नेपालीहरुको सक्रिय सहभागिताका लागि ‘एक साथी नेपाल पठाउँ’, ‘नेपाली भाषा र संस्कृति जोगाऔं’ अभियान र नेपाल फेस्टिवल जस्ता कार्यक्रमलाई संसारभर सञ्चालन गर्ने लक्ष्य लिएको पनि उनले सुनाए ।

उक्त अवसरमा संघका केन्द्रीय उपाध्यक्षहरू नरेन्द्र भाट तथा राज रेग्मी, प्रवक्ता सोम सापकोटा, सचिवद्वय प्रवीण गुरुङ तथा गंगाधर गौतम, युरोप क्षेत्रीय संयोजक चिन्तामणि सापकोटा, पूर्व सल्लाहकार हरिबोल भण्डारी, पूर्व आइसीसी सदस्यहरू बिमल सुवेदी, अर्जुन श्रेष्ठ, एनआरएनए अमेरिकाका पूर्व अध्यक्ष बुद्धि सुवेदी लगायतले शुभकामना दिएका थिए भने महासचिव डा केशव पौडेलले स्वागत गरेका थिए।

यसैगरी संघका संस्थापक अध्यक्ष डा उपेन्द्र महतो, पूर्व अध्यक्ष जिबा लामिछानेले श्रेष्ठलाई संघभित्र एकताको सूत्रधार भन्दै उनलाई सफलताको शुभकामना दिएका छन्। त्यस्तै पूर्व अध्यक्ष भवन भट्टले उनलाई समर्थ उम्मेदवार भनेका छन् भने अर्का पूर्व अध्यक्ष कुमार पन्तले उनलाई गतिशील एनआरएनए बनाउन अग्रिम शुभकामना दिएका छन्।

यसै गरी संघका संस्थापक अध्यक्ष राम प्रताप थापा, संस्थापक महासचिव भिम उदास, पूर्व संरक्षक इन्द्रा बन, पूर्व उपाध्यक्ष रामेश्वर शाहले शुभकामना संदेश पठाएका छन् । आफ्नो शुभकामना संदेशमा अध्यक्ष कुल आचार्यले महेश श्रेष्ठ एक शालीन र समन्वयकारी व्यक्तित्वको रुपमा रहेको र उनले संघभित्र सहमति र सहकार्यलाई अगाडी बढाउन महत्वपूर्ण भूमिका निर्वाह गरेको बताएका छन्।

जुमबाट शुभकामना

यसैगरी जुमबाट जोडिएका केन्द्रीय उपाध्यक्षहरू दुर्गा आचार्य तथा नारायण आचार्य, एसिया प्रशान्त क्षेत्रका संयोजक डी पी कँडेल, मध्यपूर्वका संयोजक मनोज श्रेष्ठ ‘गोर्खाली’, अमेरिकाज क्षेत्रका उपक्षेत्रीय संयोजक राम सी पोखरेल, युरोप क्षेत्रका उपक्षेत्रीय संयोजक तिलक गैरे, एनआरएनए राष्ट्रिय समन्वय परिषद (एनसीसी) बेल्जियमकी अध्यक्ष सीता सापकोटा, एनसीसी द नेदरल्यान्ड्सका अध्यक्ष थानेश्वर कँडेल, एनसीसी माल्टाका अध्यक्ष रेम्स खनाल, एनसीसी जापानका उपाध्यक्ष सुबाश लामिछाने, एनसीसी अमेरिकाका पूर्व सल्लाहकार लाल प्रसाद काफ्ले, एनसीसी जापानका पूर्व अध्यक्ष शिव पौडेल लगायतले शुभकामना दिएका थिए।

तपाइँको प्रतिक्रिया

फेसबुक