डब्ल्यूएचओद्वारा युरोपमा कोरोनाबाट फेरि पाँच लाखको ज्यान जानसक्ने चेतावनी, जर्मनीमा कोरोना संक्रमण फेरि उच्च

विश्व स्वास्थ संगठन (डब्ल्यूएचओ) ले युरोपमा कोरोना महामारि फैलिने चेतावनी दिएसँगै जर्मनीमा कोविड संक्रमणले नयाँ रेकर्ड बनाएको छ ।

बिहीवार जर्मनीमा दैनिक कोविड संक्रमण हालसम्मकै उच्च स्थानमा पुगेको छ । डब्ल्युएचओले कोरोना संक्रमण अत्यन्त बढेको भन्दै युरोपभरि फेरि पाँच लाख मानिसहरूको मृत्यु हुनसक्ने चेतावनी दिएको छ ।

बेलायत एन्टि-कोविड चक्की स्वीकृत गर्ने पहिलो देश बनेको थियो । अमेरिकाले व्यवसायीहरूलाई कोरोना रोकथामकालागि कडा नयाँ नियमहरू घोषणा गरेको छ । कर्मचारीहरुले खोपहरु लगाउनुपर्ने बनाएको छ । किनभने जाडोयाममा बढ्ने ठण्डीसँगै संक्रमणको खतरा बढ्दो छ ।

युरोपेली युनियन (ईयु) को सबैभन्दा बढी जनसंख्या भएको देश जर्मनीले दैनिक संक्रमणको नयाँ रेकर्ड बनाएको छ । रबर्ट कोच इन्स्टिच्युटका अनुसार विगत २४ घण्टामा करीव ३४ हजार मानिसमा संक्रमण देखिएको छ ।

क्रोएसियाले पनि नयाँ दैनिक रेकर्ड बनाएको छ । कोरोना भाईरसको परिक्षण गर्दा ६,३१० जनामा कोरोना संक्रमित भएको छ ।

डब्ल्यूएचओका युरोप प्रमुखले युरोपमा कोरोना भाइरस संक्रमणको गति अत्यधिक बढेको भन्दै गम्भीर चिन्ता ब्यक्त गरेका छन् । उनका अनुसार हाल भैरहेको संक्रमणको रफ्तार हेर्दा फेब्रुअरीसम्म अर्को पाँच लाख मानिसको मृत्यु कोरोना भाईरसका कारण हुनसक्छ ।

हान्स क्लुगेले एक पत्रकार सम्मेलनमा भने “हामी फेरि एकपटक कोरोनाको केन्द्रबिन्दुमा छौं ।”

डब्ल्यूएचओले अपर्याप्त खोपको दर, मास्क नलगाउने र शारीरिक दूरी कायम नगर्ने लगायतका रोकथामका उपायहरू अवलम्बन नगरिएकाले कोरोना भाइरस संक्रमण फेरि बढ्नुको कारक रहेको उल्लेख गरेको छ ।

अस्पताल भर्ना हुनेको संख्या कोरोना भाईरस बिरुद्दको खोप कम लगाएका देशहरुमा बढी भएको क्लुगले बताएका छन् ।

एएफपी द्वारा संकलित आधिकारिक राष्ट्रिय तथ्याङ्क अनुसार युरोपमा कुल दुई लाख ५० हजार कोरोनाका नयाँ संक्रमितहरु छन् र केहि हप्तादेखि नयाँ संक्रमितको संख्या लगातार बढिरहेको छ । मृत्युको संख्या पनि बढ्दै गएको छ । युरोपमा दैनिक मृत्यु हुनेको संख्या तिन हजार छ सय दर्ता भएका छन् ।

एएफपी तथ्याङ्क अनुसार पछिल्लो सात दिनमा रुसमा ८,१०० भन्दा बढीको मृत्यु भएको छ । त्यसपछि युक्रेनमा ३,८०० भन्दा बढी मृत्यु भएको छ भने रोमानियामा ३,१०० जनाको मृत्यु भएको छ ।

सन् २०१९ को डिसेम्बरमा चीनमा पहिलो पटक देखा परेको यो भाइरसले विश्वव्यापी रूपमा ५० लाखभन्दा बढी मानिसको ज्यान लिइसकेको छ ।