बत्तीस करोड रुपियाँको पुरस्कार अस्वीकार गरे जर्मन दार्शनिकले

युनाइटेड अरब इमिरेट्समा रहेको शेखहरुको सामाजिक संस्था इमिराती फाउण्डेशनले हरेक वर्ष प्रदान गर्ने बत्तीस करोड तीन लाख नेपाली रुपियाँ बराबरको पुरस्कार जर्मन दार्शनिकले अस्वीकार गरेका छन् ।

उमेरले ९१ वर्षीय जर्मन दार्शनिक युर्गेन हावरमासलाई समाजको वृहत्तर विकासको निम्ति संस्कृति, साहित्य र दर्शनको क्षेत्रमा क्रियाशील रहेबापत पुरस्कृत गर्ने र यस वर्षको साँस्कृतिक वर्ष व्यक्तित्व (कल्चरल पर्सनालिटी) घोषणाको फाउण्डेशनले निर्णय गरेको थियो ।

हावरमासले भने युनाइटेड अरब इमिरेट्सको राजनीतिक प्रणाली वंश परम्परामा रहेको र मुलुकको मानव अधिकारको स्थिति सन्तोषजनक नरहेको भनी पुरस्कार लिन अस्वीकार गरेका हुन् ।

उनले भनेका छन् ‘जुन देशमा जन्मको आधारमा देशको नेतृत्व गर्ने तहमा कुनै मानिस पुग्दछ । उनीहरुले मलाई दिएको पुरस्कार र सम्मान लिनु मेरो मान्यताको विरोधमा हुन्छ । त्यसैले मलाई यो पुरस्कार अस्वीकार्य छ ।’

इमिराती फाउण्डेशनले हावरमासको निर्णयप्रति सम्मान गर्ने जनाएको छ । वर्षेनी लाखौं डलर बराबरको पुरस्कार, दान र सम्मान दिंदै आएका धनी शेखहरुलाई एकजना बूढा दार्शनिकको यो प्रतिकृयाले लाजमर्नु बनाएको छ । ‘पहिला देशको मानवअधिकार सुधार, त्यसपछि बल्ल पुरस्कार बाँड’ भन्दै सामाजिक संजालमा दार्शनिकको पक्षमा समर्थन र सम्मानका साथ भनाइहरु आइरहेका छन् ।