कसैकै लहडमा अधिवेशन सार्न पाइदैन, त्यस्तो प्रयास नगरियोस : कुल आचार्य, अध्यक्ष प्रत्याशी
नेपालको परराष्ट्र मन्त्रालयले गैर आवाशिय नेपाली संघ केन्द्रलाई बिभिन्न ठाउँमा धाँधली भएको भन्दै परेको उजुरिका आधारमा स्पष्टिकरण सोधे पछी संस्था भित्र मन्द गतिमा देखिएको विवाद अहिले एकाएक चुलिएको छ । संस्थापन पक्षले अध्यक्षका प्रत्यासी कुल आचार्यले संस्थामा राजनीति घुसाएको आरोप लगाइरहेका छन । शक्तीको प्रयोग गरेर संस्था भाड्न खोजेको उनिहरुको भनाइ छ । त्यही पक्षले के पनि भनेको छ भने आचार्य पक्षले चुनाव हार्ने डरले अधिवेशन सार्नका लागि दवाव दिइरहेको छ । तर नेपालप्लस सँगको कुराकानीमा आचार्यले भने- कुनै पनि बहानामा अधिवेशनको मिती सार्न पाइदैन । भनेकै समय र मितिमा अधिवेशन हुनु पर्दछ ।
तपाईंहरुले एनआरएन भित्र किन राजनीति घुसाएको ?
के को आधारमा भन्नु भएको छ मलाई थाहा छैन । म तपाईंलाई के भन्न चाहन्छु भने संघ भित्र भएको ज्यादती, प्रतिनिधि चयनमा भएको अनियमितता, बिधान मिचिएका कुराहरुलाई तपाईंहरुले पनि खोजेर हेर्नुपर्यो । त्यसपछी बल्ल गर्नुहोला राजनीतिको कुरा । तपाईंले मैले एनआरएनमा गरेको विगतको कामलाई हेर्नुस् । मैले कहाँनेर आफ्नो ब्यक्तिगत स्वार्थ र गलत ठाउँमा संस्थालाई प्रयोग गरें । जसले पद्दतीको चराम दुरुपायोग गरेको छ उसैले नै गल्तिलाई ढाकछोप गर्नका लागि अरुले राजनीति मिसाए भनिरहेको छ । पहिला त कसले गल्ती गर्यो भन्ने कुरालाई मुल्यांकन गरेर हेरिदिनुस् । जसले गल्ती गरेको छ उतैबाट नै राजनीतिक रंग लगाउने प्रयास भएको छ । यसमा मेरो घोर आपत्ति छ ।
तपाईंहरुले मन्त्रालयमा किन उजुरी हालेको ?
संसारभरिका धेरै देशमा अनियमितता भए पछी धेरै साथीहरुले एनआरएन केन्द्रमा नै ईमेल र उजुरीहरु गर्नु भएको रहेछ । त्यस्ता अनियमितता भएका मुलुकहरुको समस्या समाधान गर्न उपाध्यक्ष समेतहरुले पनि निकै अनुरोध गर्नु भएको रहेछ । बिधान मिचेर अनियमितता गरिएको छ केन्द्रले छनविन गरोस भनेर पटक पटक भनिएको रहेछ । केन्द्रले कुनै अग्रसरता नदेखाएर बेवास्ता गरेपछी उहाँहरुले परराष्ट्रमा उजुरी दिनुभएको रहेछ । तर कुल आचार्यले निवेदन हाल्न लगायो भनेर मलाई बद्नाम गराउन खोजिएको छ । अती भए पछी त्यो अतीको पराकाष्ट बाहिर निस्केको हुनु पर्दछ । र, मलाई के लाग्छ भने नेतृत्वले आफ्ना कुराहरुलाई बेवास्ता गरेपछी केही साथीहरु परराष्ट्र जानु भएको हो भन्ने मैले सुनेको हुँँ । म फेरी पनि के भन्न चाहन्छु भने कुल आचार्यले परराष्ट्रमा न त कुनै निवेदन दिएको छ न कुनै दबाब । यसरी परराष्ट्रसम्म उजुरी पुर्याउने मुख्य दोषी त नेतृत्व नै हो । किन भने संस्थालाई उनिहरुले नै मर्यादित बनाउन सकेनन । बिधान मिचेर तोकिएको समय भन्दा पछाडि गएर सदस्यता बितरण गर्ने, तोकिएको समयभन्दा पछी गएर प्रतिनिधिहरुको हेरफेर गर्ने, उपाध्यक्ष र सदस्यहरुकै गुनासाहरुमा कुनै सम्बोधन नगर्ने अनी कोही परराष्ट्र मन्त्रालयमा किन गयो भने कुल आचार्यलाई प्रश्न गर्ने । कतीबिधी अमिल्दो छ होइन ? मलाई दोष लगाउनु भन्दा पहिला हामीले गल्ती गर्यौ कि गरेनौं भन्ने कुरा पहिला नेतृत्वले सोचोस भन्ने म अनुरोध गर्दछु ।
नेतृत्वले परराष्ट्र मन्त्रालयबाट एनआरएनमा हस्तक्षेप गर्यो भनिरहेको छ त ?
नेतृत्वले गल्ती गरेको छ कि छैन भन्ने कुरा पहिले त आफैंले मुल्यांकन गरोस । कुनै गल्ती नभएसम्म परराष्ट्र मन्त्रालयले गल्ती नगर भन्दैन होला । गल्ती सुधार गरे कुरै खत्तम । मन्त्रालय र सरकारलाई हामीले यसरी विवादमा ल्याउन हुँदैन । उ हाम्रो अभिभावक हो । यदी परराष्ट्र मन्त्रालयले केही कुरा एनआरएनलाई सोधेको छ भने पक्कै पनि कानुन सम्मत तरिकाले नै सोधेको हुनुपर्छ । गल्ती सच्याए त कुरै सक्कियो नि ।
हामीले हेर्दा पनि सरकारी हस्तक्षेप जस्तै देखिन्छ । तपाईंलाई किन हस्तक्षेप जस्तो किन लागेन ?
यसलाई कसरी हस्तक्षेप भन्न मिल्छ ? गल्ती अनियमितता भए पछी अभिभावकले के भन्छ त्यही हो गल्ती सच्याउ, अबदेखी गल्ती नगर भनेको त होला नि । तथापी म निवेदनकर्ता नभएको हुनाले मैले धेरै बोल्ने आधार रहँदैन । तर के लाग्छ भने अनियमितता भएका कुरा, बिधान विपरित नियमावली बनाउने कुरा, धाँधली भएका कुराहरु सच्याउँ । अबदेखी त्यस्तो नगर बन्नु कसरी हस्तक्षेप होला र । कुनै पत्रकारले अथवा कोही स्वतन्त्र ब्यक्तिले एनआरएन भित्र धाँधली भयो, बिधान मिचियो, सच्याउ भन्न पाउँछ । यो हस्तक्षेप लाग्दैन हामीलाई भने परराष्ट्र त एनआरएनको अभिभावको हो । गल्ती नगर भन्दा कसरी हस्तक्षेप हुन्छ ? त्यो त खवरदारी मात्रा हो जस्तो लाग्छ मेरो विचारमा । म पुन: के भन्छु भने हामी बिचका समस्या त्यहाँसम्म पुग्ने अवस्था किन बनाइयो ? नेतृत्वको अक्षमता होइन यो । तथापी मन्त्रालयले यो संस्थालाई चुनाव हार र जितको माध्यम नबनाइयोस भन्ने मनशाय राखेको हुनु पर्दछ ।
तपाईंहरुले चुनाव हार्ने अवस्था आएपछी अधिवेशन नै पछी सार्न खोजिरहनु भएको छ रे त ?
हामीले भर्खरै चुनाव भएपनि अत्यधिक बहुमतले जित्छौं । हाम्रो पक्षमा स्पष्ट बहुमत देखिएको छ । हार्ने अवस्था आएपछी प्रतिनिधि चयनमा कसले धाँधली गरिरहेको छ भन्ने कुरा छर्लंङ्ग देखिएको छ । चुनाव त हामीले जितेका छौं । तर अहिलेको आवाज बिधी बिधानको पालना हुनुपर्छ भन्ने हो । चुनाव हार्ने भएपछी अर्को पक्षले कसरी गडबड गरेको छ भन्ने कुरा त सबैले देखेकै छौं नि होइन र !
भन्नुस त अर्को पक्षले कसरी र कहाँँ गडबड गर्यो ?
मलाई लाग्छ अमेरिका, बेलायत र अष्ट्रेलियामा राम्रोसँग प्रतिनिधि चयन भएको छ तर यि देशमा बिबाद किन देखाइयो उनिहरु सँग प्रश्न गरिदिनुहोला । हाम्रा १७-१८ वटा देशमा चुनाव भएको छ एनसीसीको । अहिले अमेरिका, बेलायत र अष्ट्रेलियाले मात्र २५ प्रतिशतका लागि चुनाव गर्नुपर्ने अरु देशहरुले २५ प्रतिशतको चुनाव गर्नु नपर्ने हो र ? यदी विधानको पालना गर्ने हो भने सबै देशमा त्यो २५ प्रतिशतका लागि चुनाव गरौं । किन एकरुपता नगरेको ? तपाईंहरु विधान विपरित कार्य गर्ने अनी बेलायत, अमेरिका, अष्ट्रेलिया विवादित देश भन्ने ? किन देश अनुसार छुट्टाछुट्टै नियम ? म संघका सबैलाई दोष लगाउन चाहन्न । तर केही ब्यक्ती छन् जसले आफ्नो निहित स्वार्थका लागि पुरै संस्थालाई बद्नाम गराइरहेका छन् ।
कांग्रेसका नेताहरुसँगको ब्यक्तिगत समबन्धका आधारमा तपाईंले नै खैलाबैला मच्चाएको कुरो छ त ?
एउटा सामान्य कुरा गरौं, तपाईं कसैको ब्यक्तिगत सम्बन्ध किन खोज्नुहुन्छ ? आफूले गल्ती गरेको छु कि छैन भनेर पहिला हेर्नुपर्यो । मैले त यत्ती मात्रै भन्छु- ब्यक्तिगत सम्बध परका कुरा हुन् संस्था भनेको नजिकको कुरा हो । यो संस्था भित्र बसेर जानी जानी गल्ती गर्ने, बिधान मिच्ने अनी अरुलाई दोषारोपण गर्ने ।
तपाईं नेताका घर घर जानुहुन्छ भन्छन ! नत्र के गरेर बसिरहनु भएको छ काठमाडौंमा ?
मेरो आफ्नै ब्यक्तिगत कामहरु छन् । कतिपय साथीहरुसँग भेटघाट गर्ने काम गरेको छु । गैर आवाशिय नेपाली संघलाई कसरी मर्यादित बनाउन सकिन्छ, ति लाखौं नेपालीहरुलाई कसरी नेपाल सँग जोड्न सकिन्छ भनेर नेपाल सरकारका पदाधिकारी र बिभिन्न राजनीतिक दलका नेताहरुसँग छलफल परामर्श गरिरहेको छु । म कुनै नेताकहाँ मेरो कुनै ब्यक्तिगत काम लिएर गएको छैन । त्यहाँ गएर मैले कुनै पद पाउने होइन । मेरो उद्देश्य मात्र विदेशमा रहेका नेपालीहरुका समस्या समाधान गर्दै उनिहरुलाई कसरी नेपालसँग जोड्ने भन्ने हो । त्यसको बिन्दु भनेको नेपाल सरकार र नेपालका राजनीतिक दल नै हुन् । त्यसैले सबै दलका नेताहरु, मन्त्रिहरुसँग भेटघट भईरहेको छ । उद्देश्य ठुलो छ । कुराहरु सामान्य छन् हामी कसरी जोडीने । यि भेटघाटमा चुनाव वा अधिवेशनको कुनै तारतम्य छैन । म पहिले पहिले पनि यसरी नै भेट्थें ।
तपाईंहरुले किन अधिवेशन सार्न खोजेको ?
कसले भन्यो हामीले सार्न खोजेका छौं भनेर । हामी त त्यही कुरामा अडिग छौं, कुनै पनि हालतमा तोकिएको समय भन्दा पछाडी अधिवेशन सार्न हुँदैन । भएका गल्ती, अनियमितताहरुलाई छिटो भन्दा छिटो समाधान गरेर संस्थालाई मर्यादित रुपमा अघी बढाउन जरुरी छ । कसैको लहडमा अधिवेशन सार्न पाइँदैन, त्यस्तो प्रयास नगरियोस् । एक मिनटपनि अधिवेशनलाई पर धकेल्ने हाम्रो मनशाय छैन । बरु समयमा अधिवेशन नगराउन षडयन्त्र भएको संकेत देखिएको छ । तपाईंले मलाई टार्गेट गरेर जुन कुरा सोध्नु भएको छ- म भन्छु गैर आवाशिय नेपाली संघको समयतालिका र आइसीसीको निर्णय अनुसार नै अधिवेशन हुनुपर्छ भन्नेमा मेरो अर्को मत छैन । तर कस्तो देखिएको छ भने समस्याहरु उत्पती गराएर अधिवेशनलाई पर धकेल्ने छल अन्त कतैबाट भएको छ ।
अब समस्याको समाधान कसरी गर्ने त ?
जहाँँ जहाँँ बदमाशी भएको छ त्यस्ता सबै ठाउँँमा बिधान सम्मत रुपले सच्याउने हो भने त समस्याको समाधान भइहाल्छ नि । यसबारेमा अध्यक्ष ज्युले सोच्नुहुन्छ भन्ने मेरो अपेक्षा छ ।
अध्यक्षले नै राजनीतिक हस्तक्षेप भयो भनेर भनिरहनु भएको छ त ?
राजनीतिक हस्तक्षेप भने पनि उहाँले निस्पक्ष काम गरिरहनु भएको छ भन्ने कुरा मैले विश्वास लिएको छु । हामीले हाम्रा समस्याको समाधान आफैं गर्यौं भने बाहिरको कसैले पनि खेल्ने मौका पाउँदैन । यो कुरा अध्यक्ष ज्युले राम्रो सँग बुझ्नु भएको छ ।
